Luke 10

Yesu Wa Tnu Nwo Abara Yi

1Dagayi wa kni owo aviyi shi tnaba wa tnu ɓa, ɓa lo azhi vinya n wo ɓei n shiri zhin ntu ge walo n wohin.

2Wa gna ɓa ge, fye gyiwye n Dagayi aba, ntu ge wa tnu n a tnu-tnuyi a awyido ba ɓa bma fye zhin, wyido lo n mwa amma atnu-tnuyi bwasun lo fyewyi nu. 3Fye lo, fyei pa ge ma tnu fye ngye akni nu fi acamcam ata-tasin. 4Fye to ku agyiwyem ko pwakun ko abuada ngun aba m. Fye to wun osa ya n zokwo m.

5Osa fya lo puwa doho-doho yi n cei, fya ci gafara. 6Nɓa gwo fye, puwa yi ɓa bwa anabarika, amma nɓa to gwo fyem, anabarika yi ɓa jeze ɓe da fye.

7Esa fya lo ezhi, fye to lo apuwa laɓa m, amma fyaku fi n puwa gmanyi, enya na gafye, fya gyi, fye to nya ɓo m. Fye to na bmazhin doho-doho yi ɓo m, ntuge tnu-tnuyi kunce a gba wo owo lada.

8– 9Ezhi nna gwo fye fya zhin aɓeye Fye gyi enya nna ga fye Fya ka anyasanyi gna, fyaci ɓa ge Shekwoyi ebemi wo lo vi-vi n fyei n sayi.

10Amma ndei ato gwo fye n ezhi yi mi, fya kun zhi n zokwo fya ci ge, 11Yi lu ofye zhi abutukun ya zhi fye n ya pita, deye zhin saida nu fya pa ngye shi fye ɓei ku wu vivi n Shekwoyi ebe mi i. 12Har ma a Sodoma yi ɓo ku gnafye bmiya zhi n owada wyi, n ɓa nu ɓo zhin alaifi da nyi. 13Wahala lo koi pmi azhi ye wato Krasinu ɓedo n Baitsaida yi, ntu ge aɓo awo-woyi n ma zhin ɓo nyi, a gna azhin ɓa Sur nu ɓedo n Sida yi, aza nɓo ɓei ɓa ku ye abui har ɓa kpe ajesakun, n tnuyi nɓa tukwo ntu bugba zhi-zhiyi ɓo. 14Kwo nu ɓo zhin Sur n Sida yi ɓo gwo ta-ta nawyi n wada wyi. 15Efye a Kafarʼnafum yi, mɓa da kni nu tu nfye tukwo a? Aɓo la fye tu fya lo eshe? Awo aɓa gba fye nu har anapi.

16Wa ci wo abara ge aza nɓa gwo fye ɓa gwo mi nu, aza nɓa na fye aɓo ɓa na mi nu aɓo. Aza nɓa na mi aɓo ɓa na Shekwoyi nu aɓo n wa tnu mi nyi.

17Osa nu abara shitnaba ɓei jeze zhi, ɓa wu wo lafiya n bugba buibui yi ɓai gna, “Har alijenu ɓai vi yi ɓeda dna nho eye.”

18Yesu wa ci ɓa ge E, maku gye shetan woi kaya shinzhi nshe ngye shi ogma zhin kwa bmiya nyi. 19Mila iko ga fye tu anuwunyi tukwo, njesun fye ɓa zan-zan fi awa atan-tasin ɓedo anapisiyi fya kpe ɓa apita, nyaho ta zhin fyem. 20Alijenu nɓa vi fye aɓeda nyi kwo to zhin nyaho nu m, ama oɓo kpakalayi okwo nu nyi ge aku efye aye ka fi nshe.

21Nsayi wa nu a agmada Zafun nya yi wa ci ge “Ma gode nhoi Shekwoyi dada, eshe nkni yi zhin ho nya nu. Ho ku aɓoye bwizhi aɓeyekpei azai nɓa kpe anyi ganyi. Amma hoi la ɓa guya gayi n yi n gaiciya ga n ho ngye aɓi nyi. O dada ma gode nhoi gama ho ɓei ye nlo nu nu. 22Emi nu zhin Shekwoyi maimako n nyaho-nyahoi zaho to lo woi kpe nugun ye m, n zai n nugun la kni ge wa wu wo”.

23Nsayi wa gna wa barage, “Fye zhin aza saʼa da nu ntuge fye ku aɓo ye gye vinya. 24A anabi n asu yi n mwa, ɓei ye ɓa gye ɓai wo a nyagye n fye ku wo fye gye nyi.”

Samariyayiza Manayi Nabari

25Nwyihoi malami dnagmayi ho wa ɓe ntuge wamwi Yesu gye. Wa ci Yesu ge, “Malami oza ɓa zhin wuna wa pwo nyalo-nyaloʼa?”

26Yesu wa nya wo ge, “Musa owa da gena n kwo tukwoʼa?”

27Malami yi wa dna ɓe gbe, “Wa cige, ye Shekwoyi eho Dagayi n ho bugbayi vinya, n ho wye-wyeyi vinya, nho akala yi vinya, nho ɓomwi vinya. Njesun ha ye ho ozado ngye shi ho ye hohin tukwo nyi.”

28Yesu wacige, “Ho kuda dai-dai zhin aɓeye. Ho ɓa pwo.”

29Malami yi wa ye ntuge wa gni wohin, Wa nya ge, “Nyikado nu zhin mi zadoʼa?”

30Yesu wa gawo misali ye, “Zaho ɓei laka n Jerikwo woi lo Urushelima, avi ɓa wan wo n zokwo ɓa gwo wa je n agyiwye yi, ɓa luwo har wa gafi.

31“Nsahi pirist ho wa duya, shi wo ɓei gye zahi, wa bmaya wa fa wo shi ɓo. 32Zaho njesun n wo bmazhi n aduwa nyakun waduya wa fawo shi ɓo njesun.

33“Amma shi Samariya yi za do ho ɓei gye wo, sun-sunʼa wan wo. 34Wa ce akwo-kwo shi n wo aba, wa zhanwo aciya, wa pa ɓa n bandeji yi. Nsayi wa lawo tu n jaki, har wa lo n woi n puwa ho, wa zhin wo nyasan. 35N labmi yi wa ga puwa da agyiwye, n nabai wa bma nyasai zhin. Wa ciwo ge n agyiwye ɓo dutu mi ɓei gba ho mi la zhi.

36“To n ho wyegye ma nyikanu zhin nyasan yi zadoʼa?”

37Malami yi wa cige, “Oza n wa bma wo zhin nyi.” Nsayi Yesu wa ciwo ge, “lo ho zhin lonu.”

38Ɓa ɓe puwa ho aba n Marta ɓei dna nyi. Marta kwa wa ɓa gwo. 39Maryamu, Marta mado wa lo wa sase shi n Yesu aba, woi kna Yesu ɓeda tnubua.

40Amma Marta lo wa zhin nyagyi. Shi wo ɓei gye kwo la gna wo gna-gna, wa ɓe wa gna Yesu ge, “Dagayi, Hoto ku gye Maryamu shi woi gyi mifi to woi zhin yaho m? Lawo kala ya wa ɓe wa bma mi zhin.”

41Amma Yesu wa ciwo ge, “Marta hola damu n aɓoye tukwo vinya. 42Onya lo gmanyi nu n kwo bmiya na damu n kwo ɓo. Maryamu la kwo kni, mi tago wo kwo ya m.”